De klääne Kurpälzer Wagner-Opern-Führer

Leseprobe

Rhoigold:

Daß halt aach der klääne Månn
Opern gut vestehe kånn,
will isch fa die Åmadëre
mol es Rhoigold jetz erkläre:

...
Wagner hot sisch fa soin Ring
der Niwelunge ausgewählt,
e Zeit wo ma ån Määrscher glaabt
un die wie Tadsache vezählt:

Drei Nixe sin als froh un frei
im roine Rhoi erum geschwumme,
quasi als åntige Piepshow,
die waa dåmols noch fan Umme.

Alberisch der bëse Zwersch,
der grabscht un grabscht un nix geschieht,
die Rhoidëschder sin ihm zu schnell,
er kånn bloß gugge wassa sieht.

Die Nixe ham do nix degeh,
des is schun eher in ihrm Sinn,
mit some geile Spånner, weil se
exhibitionisdisch sin.

Do plëtzlisch glitzerts uffem Grund,
de Alberisch hots glei endeckt,
es Rhoigold hodda grad gefunne,
was do in de Felse steckt.

„Ei was kånn dånn des bloß soi,
sowas hab isch noch nie geseh?“
„Des is unser Råmbelischt,
des is halt wie im Variedé.“

Die Rhoidëschder finnen des luschdisch,
Alberisch zeischt kää Indresse,
als die Nixe zum Gehoimnis,
alle Diskretion vegesse:

Wer vum Rhoigold sisch en Ring
kënnt schmiede losse, hätt die Macht
weit ïwwer alle Kondinende.
Allerdings kääm in Betracht

nor der, der kalt un grausåm is,
un so den Deifel bloß veehrt,
vor allem mëglischst impodent,
kää Liebe un kään Sex begehrt.

Doch de Alberisch wär net
im Stånd, die Ford’rung zu erfïlle,
er wär halt en Luschtmolsch, un der
Trieb wär stärger als soin Wille.

Un so lång sie ummen drudeln,
un er nooch ne grabsche dät,
in de Hoffnung, was zu fasse,
wära bloß e Marionett.

Doch do ham sisch die drei Nixe,
gånz gewaldisch ïwwerschätzt.
Gold un Macht ham immer schun
Gefïhl in Zahle umgesetzt.

De Alberisch muß jetz bloß lache,
reißt des Gold mit aller Macht,
dånn aus dem Riff un daucht mit unner,
um die Nixe werds jetz Nacht.

Es nägschde Bild zeigt dånn e Burg,
e Burg die uffen Bersch gebaut,
sodaß ma zu der Burg enuff
un vun der Burg erunner schaut.
...